Даншүг наадам

Түшээт хан Гомбодоржийн хөвгүүн Занабазарыг таван настайд нь шашны тэргүүн Богд Жэвзүндамба хутагтад өргөмжилж арслант ширээнд залж, нас өлмий бат байхын тухайд Даншүг буюу Бат оршил өргөн, цугларсан олон наадам хийж цэнгэн баяссан байдаг. Ийнхүү Даншүгийн хурал өргөлийг даган хийдэг наадмыг Даншүг наадам хэмээн нэрлэж иржээ. Өндөр Гэгээн тэргүүтэй үе үеийн номын Богд Жэвзүндамба хутагтуудад Даншүг өргөн, наадам хийдэг уламжлал хүрээнд тогтож, сүсэгтэн ард түмэн өргөн дэлгэр оролцдог байсан аж. Эрийн гурван наадмаар Даншүг наадмыг хийдэг байсан ажгуу. Үүнээс хамгийн гол наадам нь хүчит бөхийн барилдаан юм. Даншүг наадмаар сайн барилдсан бөхчүүдэд цол чимэг олгодог байв.